e-distrito


Os galegos son dos máis escépticos cos horóscopos e a homeopatía

Os galegos son dos máis escépticos cos horóscopos e a homeopatía

  Só un 0,5 por cento cre na fiabilidade da astroloxía, e un 17,9 na homeopatía, segundo a enquisa estatal sobre a percepción da ciencia.

  21 abril 2.017

  A  enquisa de percepción social da ciencia, realizada pola Fecyt, aporta numerosos datos de interese sobre a visión que os galegos e o resto de comunidades autónomas do Estado teñen do coñecemento científico. E racha con moitos dos estereotipos “máxicos” creados sobre Galicia. Amais de desvelar que un de cada dez habitantes descoñece que a Terra xira arredor do Sol, a enquisa amosa que, con todo, os galegos son dos máis escépticos respecto á fiabilidade da homeopatía, os horóscopos, a numeroloxía, acupuntura ou os fenómenos paranormais.

  Só o 0,5 por cento, é dicir, un de cada douscentos galegos, cre que “sucede o que prognostican os horóscopos”. É a porcentaxe máis baixa de todo o Estado, na que a media está no 5,5 por cento. Do mesmo xeito, os galegos somos tamén máis escépticos que a media española no tocante á homeopatía. Aínda así, hai un 17,9 por cento que cre que esta pseudociencia é moi efectiva. É a sexta menor porcentaxe do Estado, lonxe da media española, que está nun 26 por cento. Se engadimos ás persoas que confían “algo” na homeopatía, a porcentaxe supera o 53 por cento, é dicir, máis da metade dos españois.

Táboa de porcentaxes sobre a opinión sobre pseudociencias, tirada da enquisa da fecyt.

  Táboa de porcentaxes sobre a opinión sobre pseudociencias, tirada da enquisa da Fecyt.

  A poboación galega tamén é máis remisa que a doutras comunidades autónomas respecto a asuntos como a acupuntura ou a numeroloxía. Sobre o tratamento de doenzas con alfinetes, un 27,7 por cento dos galegos cre que funciona, fronte ao 34,1 por cento da media estatal. Na superstición dos números confía un 6,7 por cento dos habitantes do noso país, fronte ao 11,6 por cento da media española.

  Os galegos tamén son máis escépticos que a media estatal respecto aos fenómenos paranormais e aos curandeiros, desmentindo os estereotipos unha vez máis.

  Derivado de GCiencia.

Ver todas as noticias

© 2017 E-distrito. Todos os dereitos reservados.
Queda rigorosamente prohibida a reprodución total e/ou parcial, por calquera medio ou procedemento, do contido (incluíndo textos, fotografías, imaxes, e vídeos entre outros) existente en www.e-distrito.com, sen autorización expresa. www.e-distrito.com non adquire responsabilidade sobre a veracidade ou exactitude da información descrita. As seccións Axenda e Noticias son as únicas onde se exceptúa o anterior copyright para pasar a CC BY-SA.
E-distrito adica o 0,7% dos seus beneficios a fins de interese social, erradicación da pobreza e marxinalidade, preservación do medio, desenvolvemento sostible e defensa dos animais.