E-distrito

Noticias

Morre outro paciente agardando a ser atendido no Hospital Clínico de Santiago.

Morre outro paciente agardando a ser atendido no Hospital Clínico de Santiago.

  Faleceu esperando nun corredor a ser atendido por un médico xa que todos estaban ocupados con outras urxencias, conta o sindicato OMega.

  05 febreiro 2020

  O sindicato OMega volve advertir da morte dunha persoa  nos corredores de Urxencias do Hospital Clínico de Santiago e estuda recorrer á vía penal pola "sexta morte desde 2011" no mesmo espazo, do que critica a falta "recursos loxísticos e humanos".

  "Faleceu esperando nun corredor a ser atendido por un médico, xa que todos estaban ocupados con outras urxencias e, malia ser trasladado á unidade de críticos, nada puido facerse pola súa vida", conta o sindicato, que leva semanas denunciando novos colapsos nas Urxencias do CHUS. 

  Desde a xerencia área sanitaria compostelá, pola súa banda, "lamentan" o falecemento deste varón de 84 anos que, advirten, sufriu "a deterioración da súa saúde estando á espera de ser colocado en box para unha segunda exploración" e despois de que na primeira valoración fose clasificado como de "prioridade non grave". O Sergas aclara que foi "inmediatamente ingresado na zona de críticos, onde posteriormente se confirmou o seu falecemento". 

  OMega asegura que o paciente é colocado nun corredor á espera de que quede un oco libre para que un médico "inicie a exploración do paciente e valore o que hai que facer". "O paciente levaba algo máis dunha hora, que non é tempo excesivo, pero si o é se o sitio no que o "estacionan" está fóra do control directo do persoal sanitario", engade o sindicato. 

  O Sergas asegura que o doente "tivo a primeira atención sanitaria en menos de dez minutos desde a súa chegada" e que "os seus parámetros non revelaban gravidade nin indicaban prioridade sanitaria alta". Foi, din, cando estaba á espera de pasar a box para unha segundo exploración cando a súa saúde se empeorou. 

  O Sergas asegura que o doente "tivo a primeira atención sanitaria en menos de dez minutos" e que a súa saúde empeorou agardando unha segunda exploración

  O sindicato OMega aclara que "non é infrecuente" a morte dun paciente en Urxencias e que o risco é "asumido" por todo o equipo sanitario. No entanto, asegura que "o problema xorde cando esa morte se produce nunha contorna que atenta contra a dignidade da persoa e dos seus achegados, aos que se lles deixa a dúbida de se puido facerse algo máis". Segundo denuncian fontes médicas, naquela xornada do xoves 30 de xaneiro chegou a haber "12 pacientes graves no corredor e máis de 39 pendentes de ingreso ocupando o espazo de traballo". 

  Ademais, OMega asegura que o falecemento do home podería ser "puntual", pero advirte de que xa van seis "feitos puntuais" no Clínico, en referencia ás seis mortes en Urxencias que o sindicato levou ao xulgado e ante a Fiscalía por se fosen constitutivos de delito. Todas elas foron sobresidas. "A conclusión final é que o persoal sanitario, especialmente médico, actuou con dilixencia e que non é punible; faltaría máis, eles son os que solventan todos os problemas", di OMega, que cre que hai un "veo escuro que oculta o chegar a outros posibles responsables das carencias estruturais dos servizos de Urxencias, xa que son cargos de designación política que só poden xulgarse nese ámbito".

  Desde o sindicato aseguran que a Xustiza arquiva os casos porque considera que os médicos non teñen responsabilidade e que a vía penal "non é a axeitada". Por iso, o colapso nas Urxencias vai agora pola vía social á espera de que se pronuncie o Tribunal Superior de Xustiza de Galicia (TSXG). 

  Todas as denuncias sobre mortes nas Urxencias foron sobresidas porque, di o sindicato, só valoran a actuación dos médicos e non dos cargos políticos

  Foi hai algo menos dun ano cando a Fiscalía abriu dilixencias informativas penais despois de que profesionais médicos denunciasen a morte de dúas persoas nas Urxencias do Hospital Clínico logo de tempo agardando nos corredores sen ser atendidos. Os dous pacientes faleceran o 2 de xaneiro de 2019, xornada na que persoal sanitario e usuarios denunciaron o colapso e masificación no servizo, que sumou varias semanas de folga, precisamente, denunciando esta situación e reclamando melloras.

  Fora Fátima Nercellas, delegada de persoal en Urxencias e do sindicato OMega, quen denunciara os casos. A súa acción provocou que o Sergas cargase con dureza contra ela. O conselleiro de Sanidade, Jesús Vázquez Almuíña, e o presidente da Xunta, Alberto Núñez Feijóo, encargáranse de negar a versión da doutora, á que acusaron de "mentir" ou de levar a cabo "unha canallada" a través da súa demanda ante a Fiscalía. A profesional respondeu advertindo de que avisara ata tres veces mediante correo electrónico á Administración do risco e das carencias do servizo durante o "colapso". 

  Tal e como lembram Fátima Nercellas e o sindicato OMega, con este último, son seis xa os falecementos denunciados nos últimos anos no CHUS, tras dous casos máis de mortes de anciáns agardando a ser atendidos, un en 2011 e outro en 2013, e outro dunha muller en febreiro de 2017, que fora denunciado pola Fiscalía, que acusara a Xunta. 

  Derivado de Praza.

Ver todas las noticias

Parking Mallos
Parking Mallos

Relacionados