E-distrito

Noticias

O PP avanza que "en ningún caso" apoiará que a Policía galega regulada por lei dende 2007 asuma o control do tráfico

O PP avanza que "en ningún caso" apoiará que a Policía galega regulada por lei dende 2007 asuma o control do tráfico

  A días de absterse da iniciativa do BNG para o traspaso das competencias de tráfico, os populares non contemplan cumprir a cerna do texto legal que implicaría o despregamento da Policía galega

  03 maio 2021

  O pleno do Parlamento aprobou esta semana a toma en consideración dunha proposición de lei do BNG para ser remitida ao Congreso dos Deputados e alí tramitar o traspaso ao Goberno galego das competencias en materia de tráfico e seguridade viaria. O texto é idéntico ao que fora aprobado no ano 2008 por unanimidade na propia Cámara galega, pero que fora freado ao chegar ao Congreso polo voto en contra do daquela gobernante PSOE e tamén pola abstención do PP que, se optase polo voto favorable, desequilibraría a balanza a prol do "si".

  Ao contrario do que sucedera naquel 2008, o reinicio da tramitación non veu desta volta avalado pola unanimidade dos tres grupos do lexislativo galego. Saíu adiante co "si" do Bloque, o grupo propoñente, e tamén co voto afirmativo do PSdeG, pero coa abstención do PP. É o mesmo que aconteceu na pasada lexislatura, cando foran os socialistas os que formularan unha iniciativa nos mesmos termos, pero que decaeu pola convocatoria electoral de 2020.

  Como hai trece anos, unha eventual aplicación desta lei implicaría que a Xunta asumise a práctica totalidade das competencias de tráfico e seguridade viaria (todas, agás a expedición de permisos de conducir, a matriculación e a xestión de permisos de circulación dos vehículos). Esta transferencia traería consigo unha mudanza ben tanxible para a cidadanía, xa que implicaría o despregamento da Policía galega regulada por lei dende 2007 -daquela, cos votos a prol de PSdeG e BNG e o "non" dos populares-. No entanto, apenas dous días despois da votación, o PP xa avanzou que non está disposto a permitir que isto suceda.

  Escasas horas despois da votación no Parlamento galego, algúns sindicatos policiais como a Asociación Pro Guardia Civil amosaron publicamente a súa "preocupación" pola toma en consideración da lei. Rexéitana, din, porque "abre a posibilidade a substituír as patrullas da Garda Civil nas estradas galegas por unha Policía de Galicia", ao xeito da Ertzaintza en Euskadi, os Mossos d Esquadra en Catalunya ou tamén ao xeito da asunción de competencias que se está a producir en Navarra por parte da súa Policía Foral. 

  Ante as protestas dalgún sindicato policial, os populares piden non "malinterpretar a votación" e aseguran que só apoian pedir "as competencias administrativas en materia de tráfico" porque "en ningún caso quere afastar a Garda Civil das estradas galegas"

  Ante o balbordo nalgunhas contas das redes sociais e o seu eco nalgúns medios de comunicación, o número dous de Alberto Núñez Feijóo no PP de Galicia, o secretario xeral, Miguel Tellado, saía este venres ao paso das críticas para manifestar que o partido que sustenta o Goberno non ten intención de que se chegue a cumprir a cerna dese texto. "En ningún caso, o PP de Galicia quere afastar a Garda Civil das estradas galegas", asegura.

  Reclama Tellado que "non se malinterprete a votación". A súa abstención, asegura, débese a que o PP é "consecuente co que votamos noutras circunstancias" e "sempre reclamou" o que denomina "competencias administrativas en materia de tráfico". Antes, o secretario xeral dos conservadores apuntara que considera a Garda Civil un "corpo excepcional, profesional e moderno" ao que o PP manifesta o seu "maior respecto, aprezo e recoñecemento". A votación, reitera, non implica que apoien a súa remuda porque ademais "neste momento, esa non é unha prioridade".

  A lei de Policía do ano 2007, vixente pero nunca cumprida, establecía que o "mando supremo" do novo corpo policial residiría no Consello da Xunta. A coordinación co Estado residiría na Xunta de Seguridade de Galicia, que á súa vez estaría intimamente ligada ao Centro de Elaboración e Proceso de Datos para o Servizo Policial, o espazo para a xestión da información e a intelixencia. Contemplaba sumar xentes ata chegar a uns 2.400 efectivos mediante a incorporación de membros da actual Unidade de Policía Adscrita á Xunta, do resot da Policía Nacional, da Garda Civil e a través de promocións propias.

  Derivado de Praza

Ver todas las noticias

Parking Mallos
Parking Mallos

Relacionados