E-distrito

Noticias

Abanca rescata o Deportivo e faise co control do club

Abanca rescata o Deportivo e faise co control do club

  Concederá ao club coruñés un préstamo participativo de cinco millóns de euros coa obriga da súa posterior capitalización antes do 30 de marzo.

  10 xaneiro 2020

  Abanca sae ao rescate do Deportivo. A entidade financeira, resultado da compra por parte do grupo Banesco dos restos das caixas galegas, concederá ao club coruñés un préstamo participativo de cinco millóns de euros coa obriga da súa posterior capitalización antes do 30 de marzo. Esta é só unha primeira operación dun proceso máis amplo que acabará co banco como principal accionista do Dépor e rematará coa propiedade popular dunha institución deportiva atípica na súa repartición accionarial, arestora con máis de 25.000 donos e ningún deles cun control que supere o 8% do capital. 

  Abanca concede ao Deportivo un préstamo participativo de cinco millóns de euros coa obriga da súa posterior capitalización

  Así o explicaron este xoves en rolda de prensa Juan Carlos Escotet, presidente de Abanca, e Fernando Vidal, candidato á presidencia do Deportivo, ao presentar o acordo alcanzado para salvar un club nunha "situación crítica", en postos de descenso a Segunda B, camiño do terceiro consello de administración en menos dun ano, con tres adestradores en media tempada e máis de 83 millóns de euros de débeda. 

  Escotet non aforrou cualificativos no seu intento por ser "franco e claro". "Unha empresa tan escarallada como esta non a vin, dígoo con sinceridade. Non hai maneira de facer sostible esta empresa cos números actuais e tan nivel de incerteza", dixo, tras advertir da "inviabilidade" do Deportivo "de non tomarse medidas de carácter inmediato". 

  Será Abanca quen as tome, logo de que a concesión dun préstamo de case 50 millóns que cancelou a importante débeda que o club mantiña coa Axencia Tributaria e evitou males maiores hai tan só uns anos. Os pagamentos pendentes ao banco (e a outros acredores), cos ingresos en Primeira División, eran asumibles, pero o fracaso deportivo do consello presidido por Tino Fernández e o descenso a Segunda fixeron aquel plan inviable e a ameaza da Segunda B tornou en utopía un camiño que dirixía á desaparición. Polo medio, un play-off perdido no último suspiro que mudou todo. 

  "Unha empresa tan escarallada como esta non a vin. Non hai maneira de facer sostible esta empresa cos números actuais e tan nivel de incerteza", di Escotet

  "Deuse a tormenta perfecta. O club está inmerso no maior concurso de acredores do fútbol", apuntou Vidal, tras lembrar que a débeda --reducida considerablemente nos últimos anos-- chegou a superar os 160 millóns de euros. Escotet engadiu que prefería "non personalizar", pero resumiu a situación do Deportivo como "o resultado dun proceso de moitos anos onde se foron acumulando niveis importantísimos de débeda", en referencia aos últimos anos da presidencia de Augusto César Lendoiro. En definitiva, e a tal hora, "un patrimonio negativo de 73 millóns e unha débeda superior a 83". 

  Escotet xustifica a "operación de rescate" en que é un plan "similar" ao que Abanca fixo "para rescatar outras empresas galegas". "Non hai diferenza; a nosa vocación é estritamente bancaria, profesional, e non pretende outra cousa que asegurar xustamente a estabilidade de calquera empresa galega", insistiu, tras advertir de que o banco xa actuou de maneira semellante con outras firmas no país e que fai o mesmo cunha que "é máis que un club de fútbol, é unha empresa que xera riqueza na súa contorna"

  Así, de maneira inmediata, Abanca concede ao club un préstamo participativo de cinco millóns de euros, que xa conta co visto e prace da Liga  e que terá que ser aprobado na próxima xunta de accionistas do Deportivo. Con este préstamo, a Liga permitirá ao club ampliar o seu tope salarial en algo máis de dous millóns de euros e acceder a varias fichaxes. En paralelo, tras a xunta de accionistas, o consello de administración do club convocará unha nova xunta para finais de febreiro para proceder a unha ampliación de capital.

  En paralelo ao préstamo, o Deportivo levará a cabo unha ampliación de capital polo mesmo importe do actual, uns 10 millóns de euros

  Será unha ampliación que terá o mesmo importe do capital actual do club, uns 10 millóns de euros, e aberto a todos os accionistas da sociedade e en igual número de títulos que os que posúen agora. Abanca podería máis adiante capitalizar máis cantidade da débeda que o club mantén con ela, aínda que descartou unha operación acordeón que fixese que os actuais accionistas perdesen o valor das súas accións. 

  En menos dun ano, o Deportivo podería pasar dun capital social de pouco máis de 10 millóns a outro duns 25, resultado da capitalización do préstamo de 5 de Abanca e da ampliación de capital de 10, pero é máis que probable que esta última non se complete, máis tendo en conta que non está prevista que se abra a posibles novos accionistas nin á propia entidade financeira. Só haberá unha fase para adquirir accións e non será libre. 

  Sexa como for, e coa capitalización anunciada que levará a cabo Abanca, a entidade financeira pasará a controlar o club ao ser posuídor do maior paquete accionarial, cuxa porcentaxe variará segundo a cantidade que se cubra da ampliación ou con posibles capitalizacións posteriores. 

  Cun capital social tan atomizado e con tantas accións sen actividade, o banco terá claramente o control sobre o Deportivo pero tamén a posibilidade dunha futura venda da súa parte a un investidor que, con pouco máis de 5 millóns de euros, podería pasar a dominar o club. "Non temos o reto de ser o máximo accionista do club", dixo Escotet, que insistiu na necesaria "profesionalización" da entidade deportiva. 

  Derivado de Praza.

Ver todas as noticias

Parking Mallos
Parking Mallos

Relacionados