A temperatura media foi de 21,1 graos, dous máis do normal tras un xuño que bateu todos os récords e un agosto que estivo preto de facelo.
16 setembro 2025
Longas ondas de calor, poucas choivas e tres meses nos que a temperatura media tivo un desfase de dous graos con respecto ao normal. Así foi o verán galego, o máis cálido da historia desde que se iniciou a serie en 1961, segundo Meteogalicia. A media de temperatura foi de 21,1 graos tras un xuño coas temperaturas máis altas da historia desde que hai rexistros e co segundo agosto máis caloroso. Todo o verán considérase, segundo a institución, extremadamente cálido.
En concreto, o mes de xuño foi o máis caloroso desde que hai rexistros, cunha temperatura media de 20,5 graos, 2,8 máis do normal. No caso da temperatura mínima, cunha desviación de 2,6 graos máis, foi o máis cálido da serie histórica. Os rexistros de máximas segundo MeteoGalicia foron 3 graos superiores ao habitual: o segundo máis quente ata o momento.
Unha temperatura moi superior ao normal
Pola súa banda, xullo e agosto foron meses moi cálidos. No primeiro, a temperatura media foi de 20,9 graos, o que supón 1,3 máis que o habitual. As medias das temperaturas mínima e máxima foron 1,2 e 1,3 graos superiores ao normal, respectivamente.
En canto ao mes de agosto, foi o segundo máis cálido da serie histórica e ten como característica salientable o longo episodio de calor entre os días 2 e 17. Foi nestas datas cando sucederon os incendios que devastaron Galicia. Dous estudos confirmaron recentemente que a aparición destas condicións extremas que favorecen os incendios é, en gran medida, polo cambio climático.
En agosto, a temperatura media acadou os 21,8 graos, 1,9 máis do normal. En canto ás medidas das temperaturas mínima e máxima, os rexistros foron tamén moi cálidos con desviacións de 1,3 e 2,5 graos máis, respectivamente.
Un verán moi seco
En canto ás choivas, Galicia rexistrou un verán climatolóxico moi seco cunha precipitación media acumulada entre as 16 estacións máis representativas de 51 litros por metro cadrado, o que é un 62% inferior ao habitual no período de referencia, que abrangue desde 1981 a 2010. De feito, non hai un verán tan seco desde o ano 1981.
Máis polo miúdo, o mes de xuño foi moi seco cunha precipitación media acumulada de 18 litros por metro cadrado, un 68% por debaixo do normal. Xullo e agosto foron secos con un 55% e un 58% menos de precipitacións do normal, respectivamente.
Derivado de GCiencia.
